Parlamenterê HDPyî yê Îdirî Habîp Eksîkî ard ziwan ke zîndanî vurîyayî goristanan û bîyî merkezê îşkenceyî.
Endamê Komîsyonê Heqanê Merdiman û Huqûqî yê HDPyî û Parlamenterê Îdirî Habîp Eksîkî derheqê teda û îşkenceyê zîndanan de ANFyî rê qisey kerd.
Eksîkî pare kerd ke îqtîdarê AKP-MHPyî dezgehê hukmî kerdo hacetê xo û keno ke merdiman zîndan de bêîrade bikero. Ey ard ziwan ke seke îqtîdarê AKPyî vera tepişteyan şer dayo destpêkerdene, zîndanî vurîyayî goristanan û merkezê îşkenceyî.
Eksîkî vat: ”Zîndanan ra cenazayî vejîyenê la hukmat keno ke pê vatişê ‘xokiştişî’ mîyanê karî ra vejîyo. Zîndanan de heqê xozayî yê tepişteyan yenê binpaykerdene. Sere de Îmrali de pêro zîndanan de tecrîd yeno caardene. Ganî pêro partîyî îşkence û merganê tepişteyan ser o vinderê. Ganî cade Komîsyonê Cigêrayîşî yê Meclîsî bêro awankerdene. Rojêke do nê kerdişî bêrê cigêrayene û mesuldarê nê kerdişan do hesab bidê.”
Eksîkî venga Komîserîya Heqanê Merdiman a Neteweyanê Yewbîyayeyan, Komîteya Vernîgirewtişê Muameleyo Xirab û Îşkenceyî ya Ewropa (CPT), Komîsyonê Heqanê Merdiman ê Meclîsî û pêro rêxistinanê mîyanneteweyîyan da ke vera bêhuqûqîya zîndananê Tirkîya têbigêrê û heqanê tepişteyan bîyarê ca.
