Dewleta tirkan her cayê Kurdistanî de qestî hêrişê vera herêmanê sîvîlan kena. Şaristananê Rojava û Mexmûr de şar raştê jenosîdî yeno. Hem Erdogan hem Netanyahu qetilkerdoxê gonîn ê
Verde kemalîstan kurdî qir kerdêne, nika zî îslamperestî kenê. Mabênê înan de nika “munabeve” esto. Birastî Kurdistan her tim hedefê dewletanê tirkan bî. Îradeyê şarê kurdî qetî nêame naskerdene. Tarîxê dewletanê tirkan de vera Kurdistanî dişmenîye û zorbazîye her tim estbî. Mîsal Dewleta Merwanîyana ke Amed de serranê 980an de ronîyaye, 1086 de hetê hukumdarê Selçukîyan Melîkşahî ra wedarîyaye. Oncîna Dewleta Şeddadîyan serra 951î de ronîyaye û 1175 de bi destê tirkan rijîyaye. Dima demê Împaratorîya Osmanîyan de kurdî binê serdestîya tirkan de ciwîyayî. Bitaybetî seserra XIX. de vera mîrîyanê kurdan polîtîkaya qirkere û kolonyalîste ameye caardene. Mîsal Mîrza Axa, Mîr Mihemed û Mîr Bedîrxan raştê hêrişanê gonînan ameyî.
Komara Tirkîya de zî “atavîzm” est o. Yanî bapîrê ci vera kurdan senîn têgêrayê, na komare zî wina têgêrena. Tewr zîyade kolonyalîzm hîna raver berd. Çike verde çînkerdişê kultur û ziwanê kurdan şenik bî. Labelê badê Komara Tirkîya “mankurtkerdişî” zî dest pêkerd. Rejîmê Mustafa Kemalî têna jenosîdo fîzîkî nê, jenosîdo kulturî zî ard ca. Ziwanê kurdan qedexe kerd û kultur xeripna. Bikilmî kurdî marûzê “turkofaşîzmî” mendî.
Girmike a girmik a
Serra 2002î de îslamofaşîstî ameyî îqtîdar. Çiqas ke serranê verênan konteksê persa kurdan de tayê gamê sembolî eştî, dima ra “nijadperestîya” kemalîstan dewr girewte. Nika merdim vîneno ke mabênê kemalîstan û îslamperestan de ciyayîye çîn a. Girmike a girmik a, têna bask bedilîya. Îslamofaşîstan hetêk ra vat “îslam îtîqatê aştî yo”, hetekê bînî ra vera kurdan “konseptê şerî” aferna. Bi no hawa qetlîyamê Roboskî ra heta nika Kurdistan de xeylêk qetlîyamî virazîyayî. Erdogan xeyalê Mustafa Kemalî keno. O zî wazeno çimanê tirkan de sey ey “mêrxas” bibo. Nê semedî ra Rojhelatê Mîyanênî de polîtîkaya kolonyalîste rayra beno. Hem Mustafa Kemal hem zî Tayyîp Erdoganî de “sendromê hubrîsî” est o. Merdimê ke wayîrê nê sendromî yê, wayîrê ruhê qetilkerdoxî yê zî. Seba ke kerdoxê tarîxî bibê, her çî danê kerdene. Senîn ke Dêrsim de bi destê Mustafa Kemalî qetlîyamo gonîn virazîya, nika zî bi fermanê Erdoganî Rojava de qetlîyamî virazîyenê.
Hedef jenosîd o
Êdî eşkera yo ke dewleta tirkan planê îşxalkerdişê heme Rojawanê Kurdistanî kena. Esasî 5 leteyî hedefê Tirkîya de yê. La nika Rojava zêdêr binê tehlukeyê îşxalî de yo. Rejîmê Erdoganî çend hewteyî verî Dêra Zorê de “dafike” viraşte, la cergê ci ameyî pijiqnayene. Nê rojan zî pê dron û SÎHAyan bajaranê Rojava dano bombayan ver. Têna herêmê leşkerî nê, pêro wareyî raştê bombardumanî yenê. Ma vajê santralê elektrîkî, îstasyonê gazî, bîrê neftî, nêweşxaneyê koronayî, fabrîkaya çîmentoyî ûsn. dîyenê bombayan ver. Tîya de armanc dîyar o ke rejîmo îslamofaşîst wazeno kurdî şaristananê xo caverdê. Yanî jenosîd zî yeno hedefkerdene. Kolonyalîstî fikrîyenê senî ke Efrîn ame îşxalkerdene, şaristanê bînî zî bêrê îşxalkerdene.
Camîyêk dîya bombayan ver
Kolonyalîstanê tirkan de ne exlaq, ne huqûq ne zî wijdan est o. Eke exlaq û îtîqat bibîyêne, înan kampa Mexmûrî de “camîyêk” nêdayêne bombayan ver. Hetêk ra vera Îsraîlî nêrazîbîyayîş mojnenê, hetekê bînî ra Kurdistan de camîyan danê bombayan ver. Nakokîyêka girde qewimîyena. Îslamperestî peyê kêberan de Îsraîlî reyde peymanan kenê, verê kamerayan de zî “paştî danê” xoverdayîşanê Fîlîstînî. Dirîye her cayê dewleta tirkan de eşkera ya. Mîsal Huda-par qaşo ke “kurdan” temsîl keno. Labelê vera hêrişanê Rojava tu çîyêkî zî nêkeno. Eksê ci paştî dano kolonyalîstan. Gama ke mabênê Hamas û Îsraîlî de şer qewimîya, her ca de çalakîyî kerdî. Erebî musluman ê, la kurdî musluman nîyî? Rixmo ke Huda-parî dî ke Mexmûr de camî ame bombardumankerdene, ne rejîmê Erdoganî şermezar kerd, ne zî tu eşkerarîyêke kerde. Na kamcî muslumanî ya? Îslamo ke qetilkerdoxan paweno, îslamê şarî nîyo. Ê îslamî de bendeyîye est a. Her gama na partî de paradoks, gêjîye û ehmeqîye est a. Huda-par hemkarîya dewleta tirkan keno. Bi no hawa xizmetê îdeolojîyê kolonyalîstan keno. Yanî rolê ci dozeyê Erdoganî rê kerdişê zebanîye yo.
