Şing-Ola minê
Li wê çolistana serberdayî
Bend û ayetên xwedê
Ji pêxemberên serdemê re bixwîne..
Destekî xwe ji Mehabadê re bişîne
Bila di sînga Çarçirayê de
Gula sor a şehîdan biçîne..
Destekî xwe ji Hewlêrê re bişîne
Bila Xanoyê Lepzêrîn
sirûdên Kela Dimdimê
Li meydanên azadiyê vejêne..
û baskên xwe,
Ji Birc û Kelehên Amedê re bişîne,
Bila li Deriyê çiyê
şêxê Pîranê,
Bi destê pêxemberekî bigire,
û bagera Zagrosan bi gopalê xwe rawestîne..
Dilê xwe yê ji genim û zersosinan
ji Qamişlokê re bişîne,
bila Çekjîn û Hogiran
Bila Helepçeya min a nazik
Li kuçe û kolanan
Li goristana şehîdan bibîne..
Li wir bimîne,
û bi ava gulan rêbaza evînê binivîsîne..
Birûskvedana qederan li qederan vegerîne
Destên xwe li newqa çiyê bialîne
û xwîna xwe di dergûşa xwedawendan de
Bilorîne
Bilorîne Şing-Ola minê bilorîne:
Tac im tac
Taca serê Kurdistan im.
Bilorîne..
**
Li wir bimîne..!!
Li zeviyên temenê min
Kulîlkên evîna xwe biçîne..!!
**
Li wir bimîne
Yê zimanê wî dilerize ez im
Yê giyanê wî dilerize dîsa ez im
De min bi ewrên sînga xwe binixumîne
**
Li wir bimîne
Ger birayekî birayê xwe kuşt
Bi çavekî bigirî
Û çavê din jî birijîne
Lê li wir nemîne..!!
**
li wir bimîne
Nameyên poşmaniya min bixwîne
Dilê min veke û xwe tê de bibîne
Ruhê min veke û ji min bistîne
Helbesta min jî veke
û li goristanên vê Rojavayê bigerîne
Li wir bimîne
Hetanî ku hezkirina min ev e
Bila dilê te ji min nemîne
**
Li wir bimîne..!
Min di nav bijangên xwe de
Mîna ewrekî giran hilîne..!
