Mamosteyê tirkî Hudaî Morsumbulo ke Mersîn de wezîfe keno wendekaranê xo reyde bi kurdkî û erebkî qisey kerd. No semed ra cezaya ”birnayîşê meaşî” dîyaye ci.

Mamosteyê tirkî Hudaî Morsumbulo ke Mektebê Mîyanênî yê Ulubagli Hasanî yê Akdenîzê Mersînî de wezîfe keno, seba ke wendekaranê xo reyde kurdkî û erebkî qisey kerd derheqê ci de cipersayîş dîya destpêkerdene.

Netîceya cipersayîşî de cezaya ”birnayîşê meaşî” dîyaye Morsumbulî. Qeraro ke hetê mufettîşan ra Morsumbulî rê şawîya de nê ameyî vatene: “Rixmo ke verî zî gerreyê şima bî û şima ameyî hîşyarkerdene şima kewtî teberê programê perwerdeyê dersa tirkî û dersa tirkî de wendekaran rê kurdkî û erebkî musna. Coka qerarê cezaya pereyî ame girewtene.”

Mamoste Morsumbul Mektebê Yusuf Bayikî yê Yenîtaşkentî ra amebî surgunkerdene.