Vervatoxa Yewinanê Pawitişê Cinîyan (YPJ) Ruksen Mihemede da zanayene ke dewleta tirke hêrişanê terorîstî kena û wina vat: “Ma do çarçewa pawitişê meşrûyî de bi Şerê Şarî yê Şorişgêrî erd û şarê xo bipawê, cewabê hêrişanê dewleta tirke bidê.”

Ruksen Mihemede vist vîrî ke hêrişê dewleta tirke qanûnanê mîyanneteweyîyan binpay kenê û vat: “Dewleta tirke waranê sivîlan, binawanîye û merkezanê xizmetî kena hedef. Dewleta tirke sînoranê Sûrîye binpay kena. Nika vera Rojawanî hêrişê barbarî yenê kerdene. Dewleta tirke bi bahaneya çalakîya Anqara hêriş kena la hêrişê ci hêrişê terorîstî yê. Xora AKP-MHPyî qetî hêrişê xo yê vera kurdan nêvindarnayî. Dewleta tirke pê nê hêrişan kena ke krîzê Tirkîya yê ekonomîkî û sîyasîyî binimna.

Dewleta tirke pêro nê hêrişan verê çimanê dinya de kena. Neteweyê Yewbîyayeyî, hêz û rêxistinê dinya bêveng ê ke na bêvengîye yena manaya hemkarîye. Ganî Koalîsyono Mîyanneteweyî û hêzê Rûsya vera nê hêrişan tewirêkê xurtî bimojnê. Çike şarê Rojawanî vera DAÎŞî şer kerd û pêro dinya pawite. Ganî nika zî dinya şaranê Rojawanî bipawa.

Ma do sey YPJyî vera nê hêrişanê dewleta tirke erk û mesuldarîyanê xo bikerê. Ma do çarçewa pawitişê meşrûyî de bi Şerê Şarî yê Şorişgêrî erd û şarê xo bipawê, cewabê hêrişanê dewleta tirke bidê. Xoverdayîşê ma bi şîarê ‘Jin, Jiyan, Azadî’ dewam keno. Ganî têkoşîn û xoverdayîşê şarê Rojawanî zî her cayî ra vila bibê. Wa cinî û ciwanî wayîrê Şorişê Cinîyan ê Rojawanî vejîyê.”