Parlamenterê HDPyî Hişyar Ozsoyî ard ziwan ke Erdogan wazeno weçînayîşan ra ver serfîrazîyêka qije bivisno destî û vat: “Erdoganî pêro weçînayîşan ra ver hêrişê kurdan kerd. Beno ke reyna wina bo.”

Hemvervatoxê Komîsyonê Têkilîyanê Teberî û Parlamenterê HDPyî Hişyar Ozsoyî ANFyî rê qisey kerd û da zanayene ke hêrişê îşxalî yê ke 17ê nîsane de reyna dest pêkerdê seba zixmkerdişê îqtîdarê AKP-MHPyî yo.

Ozsoyî vat: “Dewlete pê pêro îmkananê xo hêrişê kurdan kena. Eşkera yo ke tîya de têkoşînêko çetin esto, rewşêka şerî est a. Şerê Rûsya-Ukrayna serê asayîşê Ewropa û hîrakerdişê NATOyî de Tirkîya rê zemînêko cidî yo dîplomatîk û sîyasî viraşto. Tirkîya xîret kena ke nê zemînî bişuxilna û pê tedaya vera Swêd û Fînlandîya dişmenîya vera kurdan ser o NATO bianjo masaya bazarîye. Wexto ke îmkanê çareserîya meseleya kurdan zere de est bî, no îmkan nêşuxilîya. Nika meseleya kurdan rojdemê NATOyî de ya. Qet yew serekkomarê Tirkîya hende Erdoganî na mesele nêkerdbî meseleya dinya. Erdogan xîret keno ke merkezanê winasênan reyde bazarîye bikero, tawîzan bigêro, eke firsend bivîno hêrişê Rojawanî bikero. La cayê çareserîya meseleya kurdan Tirkîya, Anqara, Amed, Qamişlo yo.”

Ozsoyî bale ante ser ke Erdoganî derheqê hêrişêkê neweyî yê vera Rojawanî de eşkerayîyî dayî. Ozsoyî vat: ”Erdogan wextêkê dergî ra nata amadekarîyan keno. Xora hişmendîya dewlete tim seba hêrişanê vera kurdan amade ya. Erdogan wazeno weçînayîşan ra ver serfîrazîyêka qije bivisno destî. Erdoganî pêro weçînayîşan ra verî hêrişê kurdan kerd. Beno ke reyna wina bo.”