Polîsanê dewleta tirke hunermendanê ke waşt Qirkerdişê Parisî yê 23ê Kanûne şermezar bikerê destbend kerdî.

Vengdayîşê Komîsyonê Kulturî yê HDKyî, Merkezê Kulturê Mezopotamya, BEKSAV û Kulturê Golge ser o hunermendan waşt ke verê Sersefîrîya Fransa ya Stenbolî de şehîdanê Qirkerdişê Parisî yê 23ê Kanûne yad bikerê û qirkerdişî protesto bikerê.

La hunermendê ke Parlamenterê HDPyî Musa Pîrogluyî reyde ameyî verê sersefîrîye hetê polîsan ra gêrîyayî binê ablûqa. Çapemenîye bi zorî ameye dûrvistene û xeylêk kesî ameyî destbendkerdene.

Pîrogluyî verê sersefîrîye de eşkerayîye daye û vera hêrişanê polîsan nêrazîbîyayîşê xo mojna. Pîrogluyî pare kerd ke sey polîsanê Fransa polîsê tirkî zî kenê ke verê protestoyan bigêrê la verê qirkerdişan nêgênê. Pîrogluyî venga hukmatê Fransa da ke wa qirkerdişî roşnî bikero.

Pîrogluyî vat: “Ma do qetî hesabê nê qirkerdişan bipersê. Wazenê wa kuçeyan de vengê şarî nêvejîyo. Aseno ke îqtîdar nê prosesê weçînayîşî bi ablûqayan îdare bikero. La ma do ablûqaya înan bişiknê û nê saltanatê înan birijnê.”