Qezaya Qoserî ya Mêrdînî de qeyûmî kursî û wesayîtê şarî diznayî.

Hamdîye îfade kerd ke qeyûmî kursîyan ra heta wesayîtê şaredarîye pêro çîyê ke aîdê şaredarîye yê berdê û vat: “Nika qet yew wesayîtê şaredarîye çin o. Ma bi îmkananê xo şinê yenê. Qeyûmî kursîyê parkan û parkanê domanan zî diznayî. Ma hema zî nê dizdîyan ser o cigêrayîşî kenê. Ma bi 106 mîlyon deynî şaredarîye dewr girewte. Belgeyan de aseno ke kerrayê parkeyan ameyê hêrînayene. Qeyûmî dizdî û bêusûlîyê xo bi kerrayanê parkeyan nimitê.”

Hamdîye vist vîrî ke qeyûmî xeylêk xebatkar û personelî karî ra vetê û vat: “Ma do nê mexdûran ancî bigêrê karî. Qeyûmî seba ke nas û dostanê xo bigêro karî personelê esîlî karî ra vetî.”

Hamdîye bale ante ser ke înan berê şaredarîye tira vet û bînaya şaredarîye bi temamî şarî rê akerda. Hamdîye vat: “Wexto ke şar ameyêne şaredarîye, wesayîtê xo parke kerdêne û nînan rê cezaya parke dîyayêne. Bi nê hawayî qeyûmî xîret kerd ke wa şar nêro şaredarîye. Şarê Qoserî kerdişanê qeyûmî hol zaneno. Coka şarî ma tercîh kerdî. Senî ma dest bi karî kerd dadîya Ugur Kaymazî ameye zîyaretê ma, bermaye û vat ke qeyûmî peykerê Kaymazî zî wedarnayo.”