Nika zî pêvînayîşê 16 rojnamegeranê kurdan bi keyeyanê xo yeno astengkerdene. Cinîya rojnameger Azîz Oruçî Hulya Oruçe mêrdeyê xo tena 20 deqayan dî.

16 rojnamegerê kurdî ameybî tepiştene û erşawîyabî zîndanî. Zulmê vera 16 rojnamegeran zîndan de zî dewam keno. Pêvînayîşê rojnamegeran ê bi keyeyanê înan yenê astengkerdene. Hulya Oruçe vizêr zîndan de şîye zîyaretê mêrdeyê xo Edîtorê Ajansê Mezopotamya (MA) Azîz Oruçî û tena 20 deqayan eşkaye ey bivîna.

Hulya Oruçe ANFyî rê qisey kerd û da zanayene ke na teda qestî ra yena kerdene.

Hulya Oruçe vat: “Ma sey merdimanê rojnamegeran ancax 15-20 deqayan pêvînayîş kerd. Nişka ra înan ma vetî teber û vat ke ‘qedîya.’ Wexto ke ma vera na bêhuqûqîye îtîraz kerd, înan pê ma yarî kerde û vat: ‘Kesê ke 15 deqayan erey dest pêkenê estê.’ Wexto ke mi vat êyê ke 15 deqayan erey dest pêkenê ma yê, huyayî. Zîndanê Amedî de xora camê diqatinî estê û mîyanê nê caman de zî caxî estê. Na bêhuqûqîye qestî ra yena kerdene. Reyna vanê ke rojnamegerî do sewqê Zîndanê Xarpêtî bikerê. Ganî ma derheqê na babete de hîsgêr bibê.

Oruçe qiseykerdişê xo wina dewam kerd: “Mêrdeyê mi verî zî heman zulm dî. O wexto ke sînorê Armenîstanî ra derbazê Ewropa bîyêne tepişîya û medyaya îqtîdarî seba ey vatbî ‘terorîsto ke Îranî ra derbazê Tirkîya bî ame destbendkerdene.’ Mêrdeyê mi reyna bi komployêkî tepişîya. Polîsan şewe saete 04.00 de eşt keyeyê ma ser, keye tarûmer kerd, 8 rojan nezaret de mêrdeyê mi tepişt û dima erşawit zîndanî. Mêrdeyê mi seba karanê xo yê rojnamegerîye ra tepişîya. Domanê mi mîyanê na travma de ciwîyenê. Şewe kabusan ra wurzenê û babîyê xo pers kenê.”

Hulya Oruçe îfade kerd ke mêrde û embazê ey nika hucreyê 3 kesan de tepişîyenê û venga her kesî da ke wa seba rojnamegeran têbigêrê. Oruçe vist vîrî ke bi taybetî dezgehê çapemenîye wayîrê mesuldarîyêka pîl ê û vat: “Ê xîret kenê ke rojnamegeran krîmînalîze bikerê û eke ma vera nê vengê xo mekerê na bêhuqûqîye do vila biba.”