Rejîmê Erdoganî 21 serrî yo dizdîye keno. Heqa şarî weno û her tewr çimeyanê pêroyîyan seba menfaetê xo xebitneno. Îdareyê Erdoganî hetêk ra bêrayîrîye kerde, hetekê bînî ra şar xapit. Labelê na polîtîkaya binkore weçînayîşanê herêmkîyan ê 31ê adare de pûç bîye. Hem Tirkîya hem zî Kurdistan de xeylêk şaristanan de şarî AKPyî rê “nê” vat. Netîceya weçînayîşan de eşkera bî ke rejîmê Erdoganî şaredarîyan de pergalê luks û “sefahatî” awan kerdo. Senî ke Erdoganî seba xo serayî dayî viraştene, şaredaranê AKPyî zî serayê xo viraştê. Cor ra heta cêr pêro dewlete boye dana. Seraya Erdoganî îlhamê bêrayîrîye dana. Ge-ge tirkî de vanê “Biza ke vejîyena serê dare ra bizêka/o ke bask ra ewnena/o bena/o”.
Merdim gama ke nimûneyan vîneno mat beno û eynî wext de hêrs beno. Mîsal şaredarîya Sancaktepe de şaredara AKPyî Şeyma Dogucu îsrafêko gird kerdo. Şêwirmendê Ekrem Îmamoglu Necatî Ozkanî pare kerd ke Dogucu qatê îdareyê xo de cuyêka lukse ciwîyaye. Uca de kulindêka girde, odayê arisîyayîşî, odayê meqamî û werdî bala merdimî anjenê. Yew zî Şeyma Dogucu seba xo “jakuzî” dayo awankerdene. Nê merdimî hetêk ra vanê ê “dîndar” ê, hetekê bînî ra îslamî binpay kenê. Ayeta 31. a sûreya Arafî de nusîyeno ke “Ey domanê Ademî! pay bikerê, biwerê, bişimnê la îsraf mekerê. Homa înanê ke îsraf kenê ra hes nêkeno.” Şaredarê Erdoganî hem xo sey “dîndar” mojnenê, hem zî duştê dînî yenê. Na dîndarîye nîya, dînbazî ya. Yanî îslamî seba luksê xo şuxilnenê.
Deştadarê de keyfîyet
Îsraf û keyfîyeto bîn Şirnex de qewimîyayî. Xora yeno zanayene ke şaredarîya Şirnexî de 8 serrî yo îdareyê qeyûmî û AKPyî est bî. Bajarekê Deştadarê yê Şirnexî de şaredarê AKPyî Abdulkadîr Balîcayî “masaya okeyî” eşta zerreyê awanîye. Seke awanîya şaredarîye ravurîyaye bi kafe. Şar vano ke çend serrî yo bajarekî de tu xizmetêk nêdîyeno. Seba ke rayîr çin o, roniştoxê Deştadarê kerreyan ser o rayra şinê. Hemşaredarê DEM Partî Fahrettîn Akman dîyar keno ke “awanîya şaredarîye herinda awanîya xizmetî bîya awanîya keyfî”. Rixmo ke şaredarîya Deştadarê de traktore, çemçik û wesayîtê çopî est ê, qet nêameyî şuxilnayene û pêro zengin bîyî. Yew zî faturayê elektrîkê şaredarîye nêdîyayî û deynê ci bîyo 600 hezar lîra.
Cizîr de heramîye
Şirnex de xeylêk bêrayîrîyî û bêusûlîyî qewimîyayî. Mîsal şaredarîya Cizîrî de zî “dizdîye” peyda bîye. Dayîşê mazbata ra di saetî verî, eşkera bî ke qeyûma Cizîrî Nazli Demîre fekafek 30 mîlyon lîra xerc kerdo. Demîre qaymeqamîya Cizîrî kerdêne û sey qeyûme ameye tayînkerdene. Bi îxtîmalêkê girdî cinîya “neteweperest” a. Seba erdê “Tirkîya” xo kiştêne. La se kerd? Pereyê ke bankaya şaristanan ra ameyî, bi hawayêkê keyfî serf kerdî. Nê neteweperestê tirkan dişmenê nê erdî û şaranê Tirkîya yê. Hişmendîya înan de zafane “talankerdiş, dizdîye, kiştiş, xapxapokîye” est ê. Çike netewe-dewlete hişmendîya nîyanêne awan kerde. Mîyanê seserre de Tirkîya de “rogue nation” yanî şaro heramî virazîya. Şar îdarekaranê dewlete ra perwerde gêno. Ê diznenê, şar se keno? Na dizdîye rewa hesibneno. Ê qir kenê, şar qirkerdişî zerreyin keno. Ê heramîye kenê, şar nê reftarî xo rê sey “rayber” vîneno. Netîce de kleptokrasî û şaro heramî ameyî awan kerdene. Bi taybetî rejîmê Erdoganî Tirkîya û Kurdistan de tu erjêk nêverada. Ne exlaq, ne etîk, ne huqûq, ne norm, ne demokrasî, ne edalet, ne azadîya qiseykerdişî, ne aramîye est ê. Her çî binê linganê Erdogan û “embazanê” ci de ame pelixnayene. La şarî hêvîdar ê ke demê nêzdî de her çî do bêro bedilnayene.
