Şuxulnayoxanê medyaya sanale twîtê sîyasetmedaro faşîst Umit Ozdagî ser o bi tagê “Şêx Seîd rûmetê ma yo” nêrazîbîyayîş mojna.
Serekê Pêroyî yê Partîya Zaferî Umit Ozdagî çend rojî verî hesabê xo yê medyaya sanale de derheqê Şêx Seîdî twîtêk pare kerdbî û ey rê bi hawayêkê giranî heqaret kerdbî. Şuxulnayoxanê medyaya sanale zî fotografê Şêx Sêîdî girewtî profîlanê xo û bi tagê “Şêx Seîd rumetê ma yo” nêrazîbîyayîş mojnabî.
Serekê Komela Şêx Seîd û Embazanê ci Kasim Firatî hesabê xo yê medyaya sanale de nêrazîbîyayîş mojna û vat: “Êyê ke Şêx Seîd Efendîyî rê ziwanê xo derg kenê wa bizanê ke ma çirey verê zaliman de çok nêda. Şêx Seîd Efendî rûmetê şarê kurdî û bawerkerdoxan o. Ez pê bawer a ke cewabê nê faşîstan do bêro dayene.”
Vizêr Komela Şêx Seîd û Embazanê ci, baroyanê Amed û Riha gerreyê Ozdagî kerd. Waştişnameyê gerreyî de ame vatene ke vîrameyîşê Şêx Seîdî rê heqareto giran ameyo kerdene û şar dişmenîye rê ameyo tehrîqkerdene. Baroyî wazenê ke wa Ozdag bêro cezakerdene.
