Heyetê Îdareyanê Herêman ê HDPyî çarçewa polîtîkaya qeyûman û têkoşînê hemparî yê cinîyan Amed de panel organîze kerd.

Heyetê Îdareyanê Herêman ê HDPyî Tîyatroyê Şaristanî yê Amedî de panelê bi nameyê ‘Texrîbatê ke qeyûmî waranê cinîyan de kerdo û awankerdişê xeta têkoşînê hemparî’ kerd. Vervatoxa Meclîsê Cinîyan ê HDPyî Ayşe Acar Başarane, hemşaredarê cinîyê ke dest nîyabî wezîfeyanê ci ser, Hemsereka TUMBEL-SENî ya Amedî Nîhal Yanike, Koordînatora SAMERî Yuksel Gençe, Hemşaredara verêne ya Akdenîzî Yuksel Mutlu, Endama Heyetê Rayberdişî ya Komela Cinîyan a Rosa Elîf Tîrenç Îpeke, Komela Heqanê Merdiman ra Zelal Aymene û Tîyatroyê Şaristanî yê Amedî ra Elvan Koçere tewrê panelî bîyî.

Aktîvîstê TJA, Hemsereka Pêroyî ya DBPyî Salîha Aydenîz, Komela Cinîyan a Rosa, Sereka Pêroyî ya KADAVî Ayşe Yetmen, rojnamegere Ayşe Duzkan zî tede xeylêk aktîvîstî panel de amade bîyî.

Ayşe Acar Başarane panel de qisey kerd û pare kerd ke wextê qeyûmî de şaredarîye bîya qereqol. Başarane îfade kerd ke qeyûmî wexto ke dest pê karî kerd verî dezgehê cinîyan kerdî hedef û vat: “Polîtîkaya qeyûmî netîceya polîtîkayanê îqtîdarî ya. Îtîfaqê AKP-MHPyî bi ferasetê serdestîya camêrdan têgêreno. Înan bi rejîmê qeyûmî waşt ke perspektîfê xo yê îdeolojîkî herême de ronê. Cinîyan dezgehanê şaredarîyanê ma de xo asayî hîs kerdêne. Ganî cinîyî vera nê kerdişan mekanîzmayanê têkoşînê hemparî awan bikerê. Ganî ma partîyanê bînan de nê vurîyayîşî bikerê. Xeta têkoşînê hemparî do bimojna ke têkoşînê cinîyan do senî bivurno.”