Rojnameger Seyîd Evranî şehadetê xo ra verî mesajê xo yê peyênî de wina vat: “Ez kurd a û ganî şarê mi zî azad bibo. Seba ney zî mi heta nefesê xo yê peyênî qelema xo û kameraya xo şuxilnaye, mi qiseyê xo vatî.”
Mesajê Evranî yo peyên wina yo:
“Ver bi raywanîya peyêne de!
Seba ke her hela cuye manadar biba ganî têkoşînê pîlî bêrê kerdene. Mi zî seba na mana têkoşînê pîlî kerdî. Ez kurd a û ganî şarê mi zî azad bibo. Seba ney zî mi heta nefesê xo yê peyênî qelema xo û kameraya xo şuxilnaye, mi qiseyê xo vatî. Nika ez ewnîyena ke çend nesîlî vurîyayê? Ma her roje zî zêdîyayî…
Ma wayîrê ê tradîsyonî yê ke zerreyê mezele de zî bibê, seba azadîya nê şarî çi bikewo milê ma bikerê. Coka ma est bîyê û ciwîyayê.
Pîrikê mi wexto ke hetê Şêx Seîdî de şîyêne, no têkoşîn da destpêkerdene. Ez tornê pîrikê xo ya. Mi ala ey pê Rayber Apoyî û PKKyî kirişte. Ez Amedî ra heta Garzanî, Efrînî ra heta Qamişloyî, Zapî ra heta Silêmanî, Ûrmîye ra heta Mehabadî her ca de bîya. Nika yew hetê mi Vakur, yew hetê mi Rojawan, hetê min o bîn Başûr û oyo bîn zî Rojhelat o. Ez bi temamî bîya Kurdistan. Hînî peyê mi de mîlyonî est ê ke nê tradîsyonî bidê dewamkerdene.
Hema zaf çî estbî ke ganî mi bikerdêne la wext heta tîya yo.
Oxir bo û bi heskerdişî bimanê!”
