25ê Teşrîna Peyêne 2021î Swêd de tarîxêk newe nûsîya. Reya yewine bi ke cinîyek zê serokwezîr ameye weçînayîş. Parlamento de weçînayîş pêk ame û Magdalena Andersson ya partîya Soysale ya Demokrate zê serokwezîre ameye weçînayene. Badê vengdayîşî, mîyanê koalîsyone de nîqaş vecîya û partîya Keske dîyar kerde ke êy butçeya hukmate qabûl nêkenê. Partîya Keske hukmat terk kerd û naye bi sebebê rijîyayîşê koalîsyonî. Naye ra dima serokwezîre Magdalena Anderssona ke tenê hewt saetî karê xo sero bî, îstîfa kerde. Naye ra dima 29ê Teşrîna Peyêne parlamento de reyna weçînayîş pêk ame û Magdalena Andersson reyna zê serokwezîr ameye weçînayîş. Hewceyo merdim vajo ke Magdalena Andersson bi saya rayarê cinîya kurde bîye serokwezîr.
Weçînayîşê 25ê Teşrîna Peyêne de avervistişê têkilîya bi Rayverîya Xoser ya Rojawa dekewt rojdema Swêdî. Naye bi prosesê weçînayîşê Magdalena Andersson ya Partîya Sosyale ya Demokrate ya zê serokewezîre dest pê kerde. Weçînayîşê de rayê erê û nê zê yewbînan bî. Lazimîya Magdalena Andersson bi yew rayêk estbî. Na raye zî tenê wekîla xoser û cinîya kurde Amîneh Kakabaveh eşkayêne bida. Amîneh Kakabaveh zî şertêke vernîya Magdalena ronaye û waşte têkilîya hukmatê Swêdî ya bi Rayverîya Xoser ya Rojawa reyde bêra avervistiş. Naye ra dima sekreterê partîya Sosyale ya Demokrate Tobîas Baudîn bi wekîla xoser Amîneh Kakabaveh reyde ronişt, têreyde peymanêke hadre kerdî û na peymane îmze kerdî.
Tay xalanê peymane wina yê: Partîya Sosyale ya Demokrate wazena têkilîya xo ya bi Rayverîya Xoser ya Rojawa reyde xurt bikera, êy PYD zê muxatabê qanûnî vînenê. Reyna di peymane de ame vatene ke, kesanêy ke mîyanê YPG/YPJ û PYD de ca girewtê û verva çeteyanê DAÎŞî şer kerdî lejvanê azadîye yê û terorîzekerdişê înan nîno qabûlkerdene. Îmzekerdişê na peymane, partîyêke nîjadperest yê bi nameyê Demokratê Swêdî eciz kerd. Serokê partîya nîjadperestan Jimmie Akesson wekîla xoser Amîneh Kakabaveh zê “Kurda komunîst”, PYD zê komunîst ke têkilîya înan bi PKKyî esta û lejvananê azadîye zî zê terorîst bi name kerd.
La yew çî xo vîra kerd: wextêke lejvananê azadîye Rajawa de verva çeteyanê DAÎŞî şer kerdî, canê xo seba pawitişê merdimayîye feda kerdî û heme dinya faşîzmî DAÎŞî ra xelisnayî. Jimmie Akesson tenê verê televîzyone de roniştbi û seyr kerdêne. Nê vatişî raya pêroyî yê Swêdî de raştê nêrazîbîyîşan ame û xeylê sîyasetmedar û nûştoxî, wekîla xoser û cinîya kurde Amîneh Kakabaveh û Rayverîya Xoser ya Rojawa rê paştîdayîşê xo ardê ziwan. Hewceyo vatişî ke, Magdalena Andersson bi saya na peymana xurtkerdişê têkilîya bi Rojawa, ke binkeya xo îdeolojîya PKKyî ra gêna, ameye weçînayene. Beno ke PKK parlamentoya Swêdî de nêbo, la merdim eşkeno vajo ke tesîrê îdeolojîyê PKKyî parlamento sero estbi û Magdalena deyndarê na îdeolojîye ya.
Yeno zanayîş ke Swêd serra 2006î de bi sebebê qeydkerdişê merdiman û bê binkeyêke, hetê Mehkemeya Ewropa ra amebî mahkumkerdene. Nika 15 serrî ra dima Swêd rixmo ke ameyo mahkumkerdene hama zî na polîtîkaya xo domneno û hewl dano kurdê welatpawêrî krîmînalîze bikero. Hîvî estê ke na peymane seba avervistişê têkilîya bi Rayverîya Xoser ya Rojawa reyde ame îmzakerdiş, peynîardişê krîmînalîzekerdişê kurdan biba.
