Aşma tebaxe seba êzidîyan aşmêka sîya ya. Çunke dişmen û îşxalkerî aşma tebaxe de şaro êzidî qetil kerd. Bi hezaran cinî, doman, camêrd bi hovîtî ameyî qetilkerdene. Tu dewlet û rêxistinêk wayîrê êzidîyan nêvejîya. PDK zî herême ra rema û êzidîyî teslîmê DAIŞî kerdî. Tena gerîlayê azadîye resayî hewarîya şarê êzidî û înan şarê herême pawit. Fermandaranê sey Berxwedan, Egîd, Saîd, Hamît û Zerdeştî şar fermanî ra pawit û dima ra resayî mîyanê karwanê şehîdan. Roja qetlîyamî kurdê îxanetkarî seba menfaetê xo şarê xo rê îxanet kerd û rema.
Roja 3yê tebaxa 2014î de rêxistina terorî ya olpereste DAIŞî hêrişêko hîra vera Şingal û dormeyê ci pê ard. Bi hezaran hemwelatijê êzidî, cinî û domanê êzidîyî ganî kewtî destê DAIŞî. Kesê ke ameyî esîrgirewtene ya bi komî ameyî qetilkerdene ya zî bazaran de sey kole ameyî rotene. Domanê kêna yê êzidî hetê çeteyan ra 6 serrîya xo de ameyî marekerdene. Cinî û domanê êzidî bi hawayêkê hovî raştê her tewir caardişê xiraban ameyî. Nê heme caardişî binê nameyê olî de peyda bîyî û înan şaro oldar ola îslamî ra serdin kerd.
Hemkarîya PDKyî
DAIŞî reyde dewleta tirke û PDK zî mesuldarê nê fermanî yê. Çimkî kurdê êzidî û kurdistanijê çar parçeyî kewtî hîrêgoşeyê nê hêzan. Înan her hetî ra seba çinîkerdişê kurdan pêkerd. PDK pêkerdişê xo yê bi hêzanê hegemonan reyde roja fermanî nîşan daye. Dimayê na roje PDK paştîdayîşê xo nêminit û heta îstîxbaratê tirkî reyde zî pêkerdişê ci îspat bî. PDK pê heme rêxistin û dewletanê ke vera kurdan de şer kenî, bîyo yew. Ê nika pîya hêrişê kurdan kenî. PDK her tewir hetkarîye dano dewleta tirke ke kurdan çinî bikera. Erdê xo daxî teslîmê dewleta tirke û çeteyanê hovan kerdo. Nê semedî ra vera kurdan de hêrişê girdî qewimîyenê û bi asanî kurdî yenê qetilkerdene. Êzidîyî bi nê hîssan aşma fermanî pêşwazî kenê.
Cinîyî tewrê têkoşînî bîyî
Hêrişê DAIŞî ra ver nufusê Şingalî yê şarê êzidî dormeyê 550 hezarî bî. La netîceya hêrişê hovî de 400 hezarî ra zêde kurdê êzidî ca û wareyanê xo ra bîyî vila û koçê xeylê welatan bîyî. Bado ke gerîla resa hewayîra êzidîyan û î xelisnayî, herême de yewîya Yewinanê Cinîyan ê Şingalî (YJŞ) û Yewinanê Xoverdayîşî yê Şingalî (YBŞ) ameye awankerdene. Nê yewîyî zafane kesê ke raştê teda û hêrişê çeteyanê DAIŞî ameyî ra pê ameyî. Taybet cinîyî seba ke vera DAIŞî de şer bikerî tewrê têkoşînî bî û dinya bi xoverdayîşê înan pê hesîya. No qirkerdiş verê çimê pêro dinya de ame kerdene la çewî vengê xo nêkerd. Şaro êzidî wazeno no fermano ke înan ser de ameyo vetene, sey jenosîdî bêro şinasnayene û êzidîyê ke hema zî destê DAIŞî de yî bêrî xelisnayene.
Peymana Şingalî
3 serrî verê cû mabenê hukmatê verên yê Iraqî û hukmatê Herêma Kurdistanî de bi serekatîya Mistefa Kazimî “Peymana Şingalî” ameye îmzekerdene. Şaro êzidî nê pêkerdişî sey pêkerdişê qetlîyamêkê newî bi name kenî. La nê dînamîkanê hegemonan ke seba çinîkerdişê kurdan pêkerd, nêzanê ke kurd û kurdê êzidîyî sey verî nîyê û wayîrê hêzanê xo yê.
