Rayverê Şarê Kurdî Abdullah Ocalanî ra 35 asman ra jedeyo ke zonayîs çîn o. Qeyta jew xebere Îmrali ra nêna guretene. Îmrali de tecrîdo giran û sistemade îşkenceyî yena ramitene.

Ocalan na 15ê sibata pîya 26 serrî yo Îmrali de şertanê giranan de yeno pêguretene. Armancê tecrîd û îşkenceyî têkoşînê şar û Hereketê Azadîya Kurdî ya. Dewlete wazena bi nê tecrîdî pêro qomî bicero binê bandora xo. Nêwazena qomê kurdî rayverê xo ra zonayîs bicero. Sazîyê mîyannetewî ke vera tecrîdî bêveng vindenê û politikaya dewleta tirke rê poştî danê. CPT hona raporê xo yê serva Îmraliyî eskera nêkerdo. Avûkatî honde muracatan kenê, jû cewabode zelal nêguretî. Pêro nî zelal mûsnenê ke tecrîdo ke Îmrali de dewam keno de tey bêçika nî saziyan kî est a.

Serraçarnayena Komployê Mîyannetewî yê 15e sibate yo. Tecrîdo ke Îmrali de amo ronayene, vilayê pêro zîndanan bî. Zîndanan ra kî teber de şarî ser o bi polîtîkayanê ciya ciya xo dano musnayene. Miyanê honde serran de Rayverê Şarê Kurdî Îmrali de dûstê na polîtîkaya qirkerdene xover da. Planê rayverê şarî û qomî jû bînî ra durî kerdene serkewte nêbîyî. Şarê kurdî ke na xoverdayene ra qewet ceno, vera tecrîdê giranî teber de xover dano, têkoşînêde pîlî dano.

Her ca de çalakîyî

Roza ke Rayverê Şarê Kurdî 15ê sibata 1999î de Kenya de amebî guretene, a roze ra na het bêmavên şaro kurd vera plananê tasfiyekerdene vindeno. Vera plananê çokdayene erzeno xo ver. Şaro kurd û dostê xo bi çalakiyanê xo hayr oncenê serê sîstemê tecrîdê giranî. Serva azadîya fîzîkî ya Rayverê Şarê Kurdî Abdullah Ocalanî her hetî ra nawnayîşî dewam kenê. Bakur de Rayraşîyayîsê Azadîye ameyî destpêkerdene. Zîndanan de Grevê Vesanîye, teber de Nobeda Edaletî, onca teberê welatî de çalakîyî ciya ciya est î.

Komplo ame tolvetene

15ê sibate serva şarê kurdî rozade tarî ya. Şarî roza virêne ra heta nika komplo qebûl nêkerd. Seweta tolvetena komployî est xo ver. Komplo ame tolvetene, hama qewetanê ke zerreyê nê komployî de ca guret, bi plananê bînan hedefguretena ameyoxê şarê kurdî û waştena azadîya şarî rê dewam kerd. Coka mordem besekeno vajero, komployo ke kurdan hedef ceno ewro kî hona dewam keno.

Xeleşîyayîsê şaran

Serbestîya Rayverê Şarê Kurdî yena manaya serbestîya şarî û xeleşîyayîsê şaranê bînan. Bi nê zonayîsê ke tecrîd, îşkenceye girano ke Îmrali de yeno ramitene, bi qewetê şarî, bi têkoşînê şarî ya yeno şiknayîs. Vengê şarî çixaş berz vejîya, nî politikayî honde peyser yenê pijiqnayene.