Tirkîya hefteyê over yew vecînitişê dîroke viraşt. Eno vecînitişan di dîroke biki, yew kinar ra têkoşîna verva faşîzmî, kinaro bîn ra temamkerdina îxtîdarê faşîzmî rê sehne bî.

Faşîzm vecînitişan reydi têk şono yan zî nêşono eno yew kinar, eno vecînitaşan di Erdogan bi hîle, dizdîye û êrişan reydi serkoytina xu îlan kerde.

Mijara ma eyro ra pey bi enê raştî reydi, têkoşîna verva faşîzmî ki senî hewa bo!

Verva heme çî, lazimo ke faşîzmî baş pênase bike. Faşîzm bi vatê xu bercevendîyê sermeyadaran-tekelan bi hewayê xovanê xu dewlet di ferzkerdin o. Bi eno ferzkerdin reydi zî faşîzm hêdî hêdi xu devlet mîyan di rêxistin keno. Heme kuwetê dewletî gêno xu dest û bi eno kuwet reydi zî civakî konsule keno. Eno pênaseyê faşîzmî hema hema heme dinya di enawa bîyo, Tirkiya di zî eno rastî vecînitişan di vecya worte.

Ma eşkenê vacê Erdoganî heme saziyê dewletî girotê bin kontrolê xu. Tena enê saziyî nêgirotê bin kontrolî, bi enê saziyan reydi zî menfeatê milletî nê, menfeatê tayn sermeyadarê ki dormarê ci kom bî paweno… Xu ra vecînitişan zî bi ardimîya enê komî reydi girot.

Bi enê tespîtî reydi vecya worte ke faşîzm bi vecînitişan reydi têk nêşono. Labelê senî hewa?

Bersiva enê persî ma têkoşîna werva faşîzmê dinya ra boynî…

Verva faşîzmê Îspanya yê enîya şaran hamê organîzekerdin. Enîya şaran mîyan di dewicî, karkerî, anarşîstî, sosyalîstî hetta komê ke tena demokrasî vaştênê ca girotê. Verva şefo faşîst Francoyî enîya şaran 1936 di dest bi verxwedanî kerd û hîrê serrî enê verxwedanî berdewam kerd.

Francoyî faşîzmê xu bi sloganê ‘yew dewlet, yew welat û yew serok’ awa kerdênê. Ma rê gerîp nîno nê! Franco Îspanya di bi vecînitişan reydi hamêbî îxtîdar, labelê bi xetayê çepkiran ra têkoşîna verva cê hamêy vinîkerdin.

Serranê 1930an di temamê Ewropa di faşîzmî xu ava kerdêne û heme welatan di zî verva faşîzmî têkoşîn hamêyênê organîzekerdin. Rana Îtalya di zî têkoşîna verva faşîzman di rehet nêbî. Ferkê Îtalya endamê partîya komînîst a Îtalya Antonîo Gramscî bî. Goreyê Gramscî verva faşîzmî tena çepkirî nê, heme şaran miyan di lîberalî û heylê komê cemaatî lazimo ca bigêrê. Bi enê metodî reydi Îtalya di zî verva faşîzmî zav bedel hamê dayin.

Behsê Hîtlerî ez bira ket nêkena, dîroka ci ma heme nizdî ra zanê.

Serra 1980î di zî Latîn Emarîka di verva êrişê dîktatoran têkoşîna şaran ma zanê…

Ay cax lazimo ke Kurdistan û Tirkiya di verva faşîzmî çi bike. Çîyo ki ez zana bi vecînitişan reydi ma ceribna nêbî.

Verva Erdoganî tena yew rayir esto. Ay kesê ke sew di 48 ê ke raya xu nêdaye Erdoganî lazimo bêrê têhet…

Semedê hamayîşê ci zî lazimo ke sazî û dezgeyan amade bike. Yanî bi sazîyan ez partîyanê sîyasîyan nêwana. Partîyê sîyasî yê Tirkîya zavê ci bin kontrolê Erdoganî yan zî dewleto ke girêdayê Erdoganî de yê. Ay wext tena yew rayir esto, avakerdina enîya şaran.

Ena enî lazimo heme kesan bigîro bin perê xo, eke eşkere wacê hêzê teorîya Gramscî.

Ez bawer a Tirkîya di bingehîya eno enî esta. Tena ke ay kesê ke xu ra vanê ma rayverê bi eno mijar di îkna bî. Faşîzm hem semeda yew amedij hem zî semeda yew yozgatij yan zî semeda yew zonguldagijî zî belayo. Faşîzm Tirkiya di enawa yew hewa viraşto ke millet yewbînara xov keno. Lazimo verê heme çî eno bêro şikitin. Eno mesela tenê mesela kurdan nîya, mesela heme şaranê ke Tirkiya di cuyênê ya.

Bêrê ma ena ray heme verbiryar nêbî û verva faşîzmî bibî yew.