Sîyasetmedarê Ewropa Roberta Metsola, Nikolaj Villiumsenî, Eulàlia Reguant Cura vera hêrişanê hukmatê Erdoganî nêrazîbîyayîşê xo mojna.

Vera hêrişanê îşxalî yê dewleta tirke yê serê Rojawanê Kurdistanî û Herêmanê Pawitişî yê Medya nêrazîbîyayîşî dewam kenê.

Serekê Parlamentoyê Ewropa (PE) Roberta Metsola roniştişê Strasbourgî de venga selahîyetdaranê tirkan da ke goreyê huqûqê mîyanneteweyî têbigêrê. Metsola roniştiş de hêrişê vera Rojawanî sey binpaykerdişê huqûqê mîyanneteweyî mojnayî û vat: “Hêrişê vera Rojawanî benê sebebê merg û gonîye.  Ez venga selahîyetdaranê tirkan dana ke bi hîsgerî têbigêrê, standart û huqûqê mîyanneteweyî rê hûrmet bimojnê.”

Parlamentera katalane Eulàlia Reguant Cura zî hesabê xo yê twitterî de di mektubê ke Sersefîrîya Barselona ci rê şawitê, vila kerdî û vat: “Tirkîya weçînayîşî rê verî kurdan rê şîdet kena.”

Vervatoxanê Koordînasyonê Koma Dostanîya bi Kurdan a PE Nikolaj Villiumsenî zî vat: “Erdogan hem huqûqê mîyanneteweyî binpay keno, sîvîlan kişeno û têkoşînê vera terorî asteng keno hem zî nê çîyan Putînî reyde keno. Yewîya Ewropa vera ney ganî bi qerardarî têbigêra. Hêrişî wa cade vinderê.”