Parlamenteranê HEDEPî Zeynep Oduncu û Burcugul Çubuke pêvînayîşanê butçe de bale ante polîtîkaya şerî ya îqtîdarê AKP-MHPyî û vat ke ganî yo ke perwerdeyê kurdkî bêro dayene.

Oduncu bale ante krîzanê ke şar tira nêeşkeno nefes bîgêro ser û îfade kerd,  “Îqtîdar bi polîtîkayanê şerî têna goreyê menfaetê xo têgêreno. Şar xeymê ci de nîyo. Semedê perwerdeyî zaf tay butçe ame cîyakerdene. Mekteban de wendekarî bêçareyîye ra ganê xo gênê. Xora keyeyê ke feqîr ê, şertanê zehmetan de domananê xo şawenê mekteban. Rîyê pereyê werdî, cayê mendişî û kitaban ra mekteb yeno caverdayene. Coka ma wazenê ke wa mekteban de werdo sihetin, qîmkerde û bêpere bêro dayene. Xora perwerdeyê ziwanê dayîke zî heqêko merdimî yo û heqo tewr esasî yê kurdan o. Ma wazenê wa perwerdeyê kurdkî bêro dayene. Coka ma pêvînayîşanê butçe de çalakîye kerde.”

Çubuke zî ard ziwan ke butçeya 2024î de wina yeno mojnayene ke çew vano qey qet enflasyon, vêşanîye, feqîrîye, bêkeyeyîye, întîharê ciwanan, qirkerdişê cinîyan û şer çîn o. Çubuke nê  vatî: “Gama ke qala bajaranê kurdan bêna, benê gej la vatişê demokrasî û seyyewbînîye feqê xo ra warnêdanê. Goreyê na butçe ma û îtîfaqê AKP-MHPyî eynî welat de nêciwîyenê. Qet qala raştîyan nîna kerdene. Perwerdeyê ziwanê dayîke û mekteban de werdê cemêkî yo bêpere pabesteyê yewbînan ê. Îqtîdar nêeşkeno înan  bikero vera yewbînan û îdare bikero.”