Seke yeno zanayîş do 14ê Gulane de Tirkîya de weçînayîşêko krîtîk pê bêro û mendiş ya zî şîyayîşê nê îqtîdarî ke êdî şarî pirçnayo dîyar bibo. Îqtîdarî seba domnayîşê hukmdarîya xo çend partîyan reyde tîfaq kerdo û partîyê muxalîfî zî seba şîyayîşê nê îqtîdarî bîyî yew û mabênê xo de tîfaq awan kerd. Nika ra dîyaro ke do no weçînayîş zaf binîqaş derbaz bibo û rewşa Tirkîya û şaran do nê weçînayîşî de zelal bibo.
AKPyî ra seba weçînayîşê 14ê Gulane hûmara muracatan 6 hezar û 25 a. Weçînayîşê pêroyî yê serra 2018î de zî hûmara muracatan 7 hezar û 329 bîye. 285 parlamenteranê AKPyî ra 57 nêeşkenê qaydeyê termînê 3. vera namzed bibî.
Weçînayîşê 2018î de CHPyî ra seba namzedîye 2 hezar û 485 muracat virazîyabî. Serra 2023î de na hûmare bîye 3 hezar û 500. Ame zanayene ke kurmayanê nizdîyê Serekê Pêroyî yê CHPyî Kemal Kiliçdarogluyî seba ke talîbê wezîrîye yî xo sey namzed nêmojna.
MHPyî 4 hezar û 693 muracatan ra 894 muracatî qebul kerdî û weçînayîşê 2018î de MHPyî ra seba parlamenterî hezar û 592 kesî muracat kerd.
2018 de ÎYÎ Partî de muracatê namzedîye 2 hezar û 800 bî û na hûmare seba weçînayîşo ke do bêro viraştene de bîye 3 hezar û 379.
HDPyî ra zî hezar û 147 cinîyî zî tede pêropîya 2 hezar û 783 kesî seba parlementerî muracat kerd. Weçînayîşê 2018î de zî hûmara muracatan hezar û 500 bîye.
Wexto ke merdim ewnîyeno nê dayeyan, vîneno ke MHP û ÎYÎ Partî se ra 20, CHP se ra 40 û HDP zî se ra 85 muracatî zêdîyayî. Na hûmare ra yeno fehmkerdene ke cinî seba ke xo tewr zêde HDP de vînena, wazena HDP de ca bigêra û wazena cinîyanê bindestan, cinîyê ke ameyê qetilkerdene, raştê tacîz û tecawuzî ameyî temsîl bikera.
