Seba weçînayîşê îdareyê herêmî ra şarê kurdî verê weçînayîşî ra namzedê xo vijînayî. Rojeva şarê kurdî hewayê her wextî de rewşa muhîme arz kena. Na raya verêna ke şarê kurdî bi goreyê rasterast demokrasî ra xo bedilna û namzedê xo vijînayî. Nê warî de her weçînayîş ra dime tayê merdimî şarî mîyanî de rewşa qose ra nîqaş kenê. Bi goreyê vatişan ra înan ra vanê nê namzedî kam î û çi kare yî, ma qet înan nêsirasnenê û senî hewa ameyî dîyarkerdiş û weçînayîş? Nê sebebî ra zî DEM Partî seba ke hînê şarî mîyanî de nê tewr nîqaşî nêbê û biryaro muhîm girot.
Va, wa şar verê weçînayîşê îdareyê herêmî de bi goreyê rasterast demokrasî ra goreyê delegeyan ra namzedanê xo bivijîno. Û no tewr zî namzedî ameyî vijînayîş. La ancî zî no tewr vijînayîş ra tayê pirsgirêkî vejîyayî. Seba ke tayê cayan ra îtîrazî bîyî, nê vijînayîşî ser newe ra viraştî. La çi heyf o ke ancî pirsgirêkî vejîyayî. Sarî mîyanî de hema zî biney kulturê demokrasî kemî yo û no tewr pirsgirêkî normal î. Rewşa ke şar tede ciwîyeno, na rewşe mîyanî de rasterast kulturê zanayîşê demokrasî encax ana yeno gurênayîş. Ewta de tewr muhîm zî rewşa delegeyan a. Delege ganî zanaye bo û binê tesîrê yewî de nêmano. Raştîya delegeyan çi ya û senî hewa yew delege? Delegeyê ke sazîyan mîyanî de ameyî weçînayîş rê îtîrazê mi çinî yo. La gelo seba ke weçînayîşî de sindoqan ser o kamî gurê giroto, pêro delegeyî nuştî. Her keyeyî ra tewr taynî hîrê çar kesan weçînayîş de sindoqan ser o gurê giroto û no gurê zî seba girotişê pereyan o. No hewa rewşa delegeyan çiqas raşt a? Tewr raştîya delegeyan, ganî meclîsê taxan nê delegeyî dîyar bikerdêne û hîna tayn pirsgirêkî vejîyayêne.
Seba dîyarkerdişê delegeyan ewta de rol û mîsyonê meclîsê taxan veng vejîyayî. No tewr weçînayîş şarê kurdî mîyanî de yewin o. Eynî wextî de zî yew ceribnayîşo muhîm o. Tewr çîyo muhîm zî enkay ra pey xebata weçînayîşî ya û vera polîtîkaya qeyûmî ra, şar ganî wayîrê îradeyê xo bivejîyo û bipawo. Ewta de hînê yewer nêeşkeno ke seba weçînayîşanê îdareyê herêmî, sewbîna çîyan bivajo.
Hem weçînayîş û hem zî vera tecrîdî ra xoverdayîş rewşa muqadese ya. Seba ke Rayverê Şarê Kurdî Abdullah Ocalan bi serrano ke binê tecrîdî de yo û yew demo dergo ke qet yew xeberêke nîna girotiş. Nê sebebî ra zî embazanê hepsî hewayê her wextî dest pê çalakîya grevê vêşanî yê muqadesî kerd, sazî û dezgehanê kurdan zî paştî daye embazanê hepsîyan ra. Nê rojan nobeta huqûqî zî dest pêkerdo. Her roje vera tecrîdî ra xoverdayîş û çalakîyî hîna zaf vêşî benê. Tecrîd mergê kurdan o. Şaro kurd ganî nê hewnê mergî ra wardo pay û heme hêzê xoverdayîşê xo berz bikero. Komployê mîyanneteweyî berteraf bikero û pûç bikero. Menga adare bena serkewtişê kurdan. Şaro kurd 8ê adare, 15ê adare, 21ê adare startê serkewtişê azadî dano. 21ê adare de kilaya Newroze heme cayan de vila bena û startê weçînayîşê îdareyê herêmî ra serkewtiş virazena.
