Şaredarîya Colêmergî ya qeyûmî pêro eşteyanê şaristanî verdena Gelîya Zapî û bi nê hawayî Awa Zapî jehrin bena.

Awa Zapî Wanî ra vejîyena, tewrê Gelîya Zapî bena û uca ra herikîyena Iraq û Kuweytî. Gelîya Zapî bi hezaran gandaran rê meymandarîye kena. La Şaredarîya Colêmergî ya qeyûmî pêro eşteyanê şaristanî Gelîya Zapî de verdena de çopê ke erzîyenê qeraxê Awa Zapî, hem Gelîya Zapî hem zî Awa Zapî jehrî kenê.

Hemşaredarê Colemêrgî Cîhan Karman o ke herinda ci de qeyûm amebî tayînkerdene vist vîrî ke 2009 de Şaredarê Colemêrgî yê Partîya Komelê Demokratîkî (DTP) seba viraştişê santralê pakîkerdişî Ewropa ra destek girewtbî û dest pê viraştişê santralî kerdbî. Karamanî vat: “Ez hêvî kena ke wextêkê kilmî de no tesîs bêro aktîfkerdene û Zap na gemarîye ra bixeliso.”

Serekê Komela Cigêrayîş û Averberdişê Pawitişê Berhemanê Tarîxîyan a Wanî (ÇEV-DER) Alî Kalçikî dîyar kerd ke lêşinkerdişê Awa Zapî, têgêrayîşêkê qeyûmî yo û vat: “Qeyûm cografya û xozaya herême nêşinasneno, nêpaweno. A raşte eşteyê keyeyan eşkîyenê bêrê vurnayene û tira enerjî bêra peydakerdene. Seba ke ney nêkeno qeyûm eşteyan erzeno Gelîya Zapî. Eşteyê ke deverdîyenê qeraxê Gelîya Zapî 7-24 saetan vêşenê. No zî zerar dano xoza û hewayî. Na awe bi mîlyonan merdim û gandaran rê meymandarîye kena. Bi nê hawayî awe bena jehrin. Ganî verê ney bêro girewtene.”