Çend rojî verê cû rayîrê ma bajarê Mûşî ra derbaz bî. Ma vat ke ma şêrî awanîya rêxistina DEM Partîye ya Mûşî û ma şîyî zî. Embazanê ewja bi zerrîweşî ma pêşwazî kerdî. Înan çayêko germ da ma û ma çayî reyde kewtî sohbetêkê germî. Çend ciwan û cinîyê rêxistina TJA zî ewja de bîyî. Ma qala weçînayîşan û weçînayîşê herêmî ke do biqewimîyê kerd. Weçînayîşan de şaşîyê senî qewimîyayî û do seba nê weçînayîşî çina bêro kerdiş ser de munaqaşayê hîrayî ameyî kerdiş.
Çîyo balkêş tam zî nê munaqaşayî de vejîya raşte. Embazê ke ma înan reyde sohbet kerdêne vat ke Mûş de emser hemsereke çinî ya. Ma şaş mendî û senî bajarêkî de yew cinîye seba hemserekî muracat nêkena, bajarêkî de qey cinîyêke zî çinî ya ke îradeyê cinîya bajarî temsil bikera, merdiman ecêb verdeno. Vatî eya raşt o rewşe wina ya, tîya de rewşe cîya ya. Ma kewtî sohbetê sebebê na rewşe û halê ma senî wina bîyo. Dima ra ma vat qet şima di cinîyan ra yew muracat nêkerd. Na rey vatî la ma wirdî zî nêeşkenê muracat bikerî çimkî dewaya ma est a.
Kurdî raştê teda yenê
Rewşa kurdan çi trajîk a. Hetêk de kurdî yenê çinîkerdiş û hetê bînî de zî vanê yê ke mendî wa bê tesîr bimanî û nêeşkî tu cayêk bikerî. Polîtîkaya dewlete ya bê tesîrverdayîşî û çinîkerdişî zaf baş na babete de xo nîşan dana. Bi serran o her cayê dinya de, ça beno wa bibo, cayo ke kurd tede bibî de kurdî ya yenê qetilkerdiş, ya yenê tepiştiş, ya yenê bê tesîrkerdiş û ya zî yenê destbendkerdiş. Rewşa ma kurdan çi zehmet a, ma dewletêke senî reyde têkoşîn kenê. Kurdî raştê her tewir teda û hêrişan yenê la reyna zî xover danî. Na dewlete her cayê dinya de kurdan çinî kena, la vana Fîlîstîn de qetlîyam yeno kerdiş. Vatiş û kerdişê na dewlete yewbînan nêtepişenê çimkî dewlete seba menfaetanê xo est a. Seba menfaetan her tewr rîyê îqtîdarî est o.
Kurdî xover danê
Hetêk de zîndanê Tirkîya û Kurdistanî bi sîyasetmedar û selahîyetdaranê şaredarîyan pirkerdeyî û hetê bînî de zî nika seba weçînayîşê herêmî ke do 31ê adare de biqewimîyo, amadekarî yena kerdiş. Polîtîkayê tersî her çend serê kurdan de bibê zî kurdî reyna wayîrê îradeyê xo vejîyayî. Beno ke Mûş de nê la bajaranê bînan de rewşe wina nêbî û muracat ameyî kerdiş. Vera hende polîtîkayanê lêşinan, qetlîyam û qeyûman de reyna zî bi serran o kurdî xover danî û wayîrê îradeyê xo vejîyenê.
