PYDyî derheqê teqayîşê Taksîmî de eşkerayîyêka winayêne kerde: “Dewleta tirke nê hêrişî kena milê hêzanê ma û bi nê hawayî zî hêriş û îşxalê vera Rojawanî meşrû kena.”

Meclîsê Pêroyî yê Partîya Yewîya Demokratîke (PYD) derheqê sucdarîya dewleta tirke ya ke vana hêrişê Taksîmî hêzanê Rojawanî kerda de eşkerayîyêke daye.

Eşkerayîye wina ya:

“Ma hêrişê Taksîmî şermezar kenê û nê hêrişê vera sîvîlan sey sucê vera merdimatîye vînenê. Dewleta tirke ya ke her roje sîvîlan qir kena qestî ra nê hêrişî kena milê hêzanê ma û bi nê hawayî zî hêriş û îşxalê vera Rojawanî bikera meşrû.  No hêrişo ke hetê MÎTî ra serûber bîyo armanc keno ke QSDyî krîmînalîze bikero û zemînê îşxalî rê dinya qan bikero. Dewleta tirke verî zî vera hêzanê demokratîkan û şaranê Tirkîya kayê winayênî kerdbî.

Wa komelo mîyanneteweyî pê nê kayî mexapîyo. Îqtîdarê Tirkîya yo ke hukmatê şerê taybetî yo, keno ke sucanê xo yê çekanê kîmyewîyan binimno. Ma venga şaranê Tirkîya danê ke wa verê propagandayanê MÎTî de baldar bibê û tira bawer mekerê. Ma ganî vera hukmatê Erdogan û Bahçelîyî yew bibê û şerê înan ê taybetî bin bivisnê.

Ma reyna nê hêrişî şermezar kenê, keyeyanê meftayan ra serweşîye wazenê û dirbetinan rê şîfaya xeyrîne wazenê.”