Hemsereka Komela Destayewbînangirewtişê bi Tepişteyan û Hukumwerdoxan (TUHAY-DER) ya Wanî Edîbe Babur vat ke hêrişê vera tepişteyan vera îradeyê şarî yê 8ê Adare û Newroze yê û bale ante ser ke dewleta tirke merganê zîndanan ra berpirsîyar a.

Îşkenceyê sîstematîkî yê zîndananê Tirkîya ra 3 mengan de nêzdîyê 60 tepişteyan dinyaya xo bedilnaye. Heyetê HDPyî û rêxistinê komelê sîvîlî zî şinê zîyaretê zîndanan.

Hemsereka TUHAY-DERî ya Wanî Edîbe Babur derheqê babete de ANFyî rê qisey kerd.

Babure dîyar kerd ke wexto ke îqtîdar pê îradeyê şarî nêeşkeno hêrişê tepişteyan keno û vat: ”Zîndanan ra cenazayê embazanê ma vejîyenê. Vera zîndanan her tewirê teda esta. 2022 de 60 embazanê ma zîndanan de dinyaya xo bedilnaya. Nê pêro embazî hucreyê yewkesî de bîyî. Wan de 3 embazê ma yê tepişteyî merdî. ”

Babure ard ziwan ke berpirsîyar a nê mergan dewleta tirke ya û îfade kerd: ”Yew berpirsîyara nê mergan dewlet a. Ganî tepişteyê nêweşî bêrê tedawîkerdene. Tecrîdê vera Birêz Ocalanî pêro zîndanan ra vila bîyo. Ganî tecrîd û polîtîkayê teda biqedê. Ganî embazê ma vera bidîyê.”