Rojnameger Mehmet Alî Ertaş ji 16’ê hezîrana 2022’yan ve li Girtîgeha Amedê ya Ewlehiya Bilind a Jimara 1’an girtî ye. Ertaş di 2’yê hezîranê de xwest derbasî odeya rojnamevanê girtî Azîz Orûç ku li heman girtîgehê ne bibe. Ertaş ji bo vê yekê serî li Desteya Îdare û Çavdêriyê ya girtîgehê xist. Desteyê serlêdana Ertaş red kir.
Dadgeriyê daxwazê mafdar dîtibû
Li ser vê yekê Ertaş di 16’ê hezîranê de serî li Dadgeriya Înfazê ya Amedê da. Dadgeriyê di 19’ê hezîranê de biryar da û daxwaza Ertaş mafdar dît û xwest serlêdana Ertaş bê qebûlkirin.
Cara duyemîn red kir
Ertaş li ser vê yekê biryara dadgeriyê pêşkêşî Desteya Îdare û Çavdêriyê kir û xwest daxwaza wî ya çûna cem Orûç bê qebûlkirin. Du roj berê Desteya Îdare û Çavdêriyê cara duyemîn daxwaza Ertaş red kir. Desteyê tevî biryara dadgeriyê jî ev daxwaza Ertaş red kir.
