Îtîfaqê Kede û Azadîye eşkera kerd ke ê do vîjnayîşê serekkomarîye de namzed mevejê.

Îtîfaqê Kede û Azadîye derheqê vîjnayîşê serekkomarîye de Merkezê Bazarîye yê Dinya de kombîyayîşê çapemenîye kerd. Pîya bi partîyanê Îtîfaqê Kede û Azadîye, temsîlkarê partîyanê kurdan ê Xebata Îtîfaqê Kurdistanî yo ke HDP zî tede ca gêno, ê zî tewrê kombîyayîşî bîyî.

Deklarasyon hetê Hemsereka Pêroyî ya HDPyî Pervîn Buldane ra ame wendene.

Deklarasyonî ra qismêk wina yo.

“Vîjnayîşê krîtîkî rê di aşman ra tay wext mend. Ma hela tarîxî ra ravîyarenê ke do ameyoxê welat û komelî dîyar bikero. Îqtîdarê AKPyî her warê cuye de rijnayîşê girdî kerdî. Îqtîdarê faşîstî ewroyê şarî diznayo û sibayê ci zî tehdît keno. Ma sey welat û komelî sibayê 15ê gulane de do bi hêvî hîşyar bê. Hêzê ke bedilnayîşê demokratîkî wazenê do parlamento de cayê xo bigêrê, mesela kurdan do hetê muxatabanê ci ra bi dîyalogê zelalî bêro destgirewtene, hemwelatîyî do mîyanê aştîye û azadîye de ameyoxê xo ronê, nê rojî hesret û waştişê heme însananê ma yê wayîr wîjdanî yê.

Îtîfaqê Kede û Azadîye vervatoxê waştişanê heme kedkar û bindestan o. Îrade û hêzê bedilnayîşê demokatîkî yo. Temînat û temsîlkarê heqanê şaranê ma yo. Vera talanê xoza adresê xoverdayîşî yo. Temînatê cuya azade yê cinîyan û ciwanan o. Mifteyê Tirkîyaya demokratîke yo. Ma do bi hawayêkê qerardarî xoverdayîşê xo bidomnê û waştişanê şarê xo bîyarê ca.

Ma alternatîfê sîstemê yewmerdimî yê. Ma do vîjnayîşê serekkomarîye de vera îdareyê yew merdimî berpirsîyarîya xo ya tarîxî bîyarê ca. Ma qerardar ê ke do hesabê nê texrîbatanê girdan bipersê. Coka ma eşkera kenê ke ma do namzedê serekkomarîye mevejê. Tirkîya hewceyê pêrodayîş nê hewceya wêreameyîşî ya. Kesêko komelî verdeno pê, têmîyankewtiş vejeno, dişmenenê zerre û teberî afirneno ke bêhûzûrîye gird bikero, waştişanê bi mîlyonan nêvînayîşî ra yeno, şansê ey çîn o ke ser bikewo. Ma do pêro pîya ver bi ameyoxê roşnî, hêvî û xoverdayîşî gird bikerê û semedê cuyêka newe gamanê girdan bierzê ke hesretê komelî bîyarê ca.”