Eno hefte, hefteya Newroze ya, roşano qedimî yê Rojhilata Miyanî vera veren Rayverê Şarê Kurdî Abdullah Ocalan û heme kesek ki azadi wazeno pîroz bo. Eno roşan bi verxwedanê şarê Kurdî reydi sewserra 21. di nê tena Kurdistan û Rojhilata Miyanî di, heme dinya di biyo roşanê verxwedanî…

Belê eno hefte xeylî umbazê ma ser Newroze binusî, ez wazena ser yew listikê şanoyê bi nameyê “Hucreya ke Şewa ci Çinya” binusa.

12ê adare di min yew dawet girot. Dawet welatê Baskî ra semeda yew listikê şanoyê hamêy bi. Semeda şiyayişê ez verê tikî bêzeri biya. Hefteya Newroze ya, vecînitîşî hamey verî berî, miyandi andi karîdi şiyayişê mi, bê imkan bê. Mi va vindi Mahîr, hele nameyê enî listikî bidi Google, ka çi vecêno. Mi nameyê listikî da Google ey çi boyna! Yew koma listikvanê Şanoyê Korsika, ser Rayverê Şarê Kurdî Abdullah Ocalanî, di serî over yew listik amade kerdo û eno listik 12ê adara di vecêno turneya Ewropa û organizatorî enê şanoyî wazenê roco verîn medyaya Kurdî zî amade bo. Meraqê mi zav vêşîbî, mi wa çi bibo wa bibo ez şona welatê Baskî û mi da rayir û ez şiya….

Teyaraya ma nizdiyê paytexta welatê Baskî Bilbao bi, qelecanê min hema zî vêşîbî. Wey welato ke 4 hezarî û 774 kîlometre Kurdistan ra durîyo û semedê azadiya şarê Kurdî koyto miyanê yew teşqeleyî….

Donostia û San Sebastian

Ma yew saet ra vêşêr miyanê şînayî ya welatê Baskî ereba reydi hamê suka ki listik bêro kaykerdin. Verê suke di çî bala min ant. Yewin nameyê suka San Sebastianî. Nameyê San Sebastianî ziwanê Baskî di Donostia yo. Verê ki kê bikewê miyanê suke, tabela di Donostia / San Sebastian niseno. Mi umbaza ki ma pêşwazî kerdîbî, umbaza delale ra pers kerd. Wa kî seni şima heti Dêrsim û Tuncelî esto, ma het zî eynî pirsgerêk esto. Coka ma mecburê kişta Donostia, San Sebastian zî binêsê. Mi eno raştê nêzanaynî coka tikî zî mi şerm kerd.

A diyen zî; nameyê mahleya ki listik bêro kaykerdin Amara bi. Ez xu rê mat menda. Eno tesaduf o yan zî ez hoyn veynena! Nameyê dewa birêz Abdullah Ocalanî suka Donostia di nameyê yew mehleya û ena mehla verva faşizma dewleta Îspanya di rolo pîl kay kerdo…

Heta şandî ma resay salona teatroyî. Mi wa salona teatro! şima yew salona normale miyarê çimanê xu ver… Wortê salone di 50 hebi kursî û dormarê kursiyan di zî zew sahneyo 4 koşe. Ma roniştî, vengê pelê aw hamêynî. Hama listik dest nêkerdîbî kê watinê kay kê miyanê yew hucra dî û hucra zî behr miyando… Bi efektan reydî ma dekoytî ay psikoloji…

Listikî dest pê kerd. Dormarê ma di 3 hebî listikvanî listik kay kenê, şonê û yenê. Ray ti hoynînê vernî di, ray peyniya ma di. Ray polo çep, ray zî polê rastî di. Ma zî serê kursiyan di eno pol, ay pol tadiyanî. Yani direktorê listikî yev sehne viraşto ki, temeşevanî verniya listikî heya peynî worte di roşenê, listikvanê dormarê temeşevanan di listikê xu kay kenê….

Ez miyanokê listikê wêşî nêwazena binusa, yew roc kismet bibo eno listik bêro Kurdistan, xurê şêrê temaşê bikê….Tena şêna yew kal waca; eno listik tecrid û verxwedanê Rayverê Şarê Kurdî Abdullah Ocalanî verva tecridî zav weş veto worte.

 

‘Mi waşt biba vengê Ocalanî’

Şano kedya, ez bilez şiya pey sehnê û mi dest bi persanê xu kerd.

Persa yevin mi senaristê listikî Galder Îrustra ra persaye, Galder yew ciwano hema 27 serre yo. Mi wa to key enesar yew listik nusna? Bersivê ci zav balkêş bî. Wa kî, “Abdullah Ocalan tena yew şoreşgêr niyo, eynî wexti di yew filozofêko pil o, mi waşt tena biba vengê ci û fikrê ramanê ci bi rayirê teatroyî reydi dinya di vila bika…”

Listikvan Roberto Bautista şano di rolê gerila kay keno. Persa min semada ci, “rolê to eno listik di çi mesaj dano temeşevanan?”

Roberto Bautista; “Abdullah Ocalan 23 serriyo girava İmralî di bi tenayî ya xu fikrê modernîta demokratîke vet worte. Wexto kî mi Abdullah Ocalanî û tekoşîna ci wende zav bandor biya û mi wa; lazimo ezî keda xu deka enî karî miya coka mi qebul kerd.”  

Listik di rola ceniya Noelia Campos Actriz kay kerdînî. Ya zî ser rolê xu eno ard ziwan; “Abdullah Ocalanî semeda cenîyan yew fikro newe vet worte, lazimo her ceniya şoreşgêre semeda eno fikrê Abdullah Ocalanî yew çî biko,mi zî bi eno listik di waşt biba alîkarê fikr û ramanê Abdullah Ocalanî.”

 

‘Zext û zulmê dewleta tirke’

Listikvano hîreyin Andrés Montero zî semeda listikê “Hucreya ki Şewa ci Çinya” eno wa, “Ma eno listik di hirê tenê, heme hirê tene zî yew karekterê Abdullah Ocalanî yê. Ma waşt verva zext û zilmê dewleta Tirk ay hucre di Abdullah Ocalan raştiye di tena nê bi milyonan reydi verxudano. Yanî listik di yew Abdullah Ocalan çinyo, ma heme hirê zî Abdullah Ocalanî, hezeki her Kurdo ki miyanê tekoşînê di bi Abdullah Ocalanî reydî verxudanî miyando, ma waşt enê nişan bidê.”

 

Pîlîya Rayverê Şarê Kurdî

Peynîya şewe di ez xu rê hem xemgîn biya hem zî serbilind biya. Kurdistanî ra nizdî 5 hezar kîlometre durî di, yew listik terafê şanogerê korsîkayican di hamo amade kerdin û welatê Baskî di yeno kaykerdin. Hem listikvan hem zî temeşevanan pîlîya Rayverê Şarê Kurdî Abdullah Ocalanî keşif kerdo, labelê hama zî bindest o…