Parlamentera HDPyî Gulîstan Kiliç Koçyîgîte vat ke ê seba meseleyanê şarî têgêrenê û wayîrê çareserîye yê.

Parlamentera HDPyî ya Mûşî Gulîstan Kiliç Koçyîgîte derheqê girîngîya mîtînganê Amed û Stenbolî yê HDPyî de ANFyî rê qisey kerd.

Koçyîgîte ard ziwan ke asta beşdarîya mîtîngan mojnena ke şar polîtîkayanê HDPyî qebul keno û vat: “Ma welat de seba meseleyanê şarî têgêrenê û ma wayîrê çareserîye yê. Babeta ke ma seba ci têgêrenê de, ma pêşnîyazê xo yê çareserîye zî îfade kenê. Nê prosesî de şar mîyanê krîzanê îtîfaqê AKP-MHPyî de yo. Ma bi perspektîfê xo yê rayîrê 3. demokrasîyêka raştîkêne pêşkêş kenê.

Mîtînganê ma de bi des hezaran kesan vat ke ‘şerî rê nê.’ AKP key teng bibo şerêkî dano destpêkerdene. AKP-MHP seba ke newe ra weçînayîşan de ser bikewo wazeno kurdan qir bikero, bi îşxalê Rojawanî hîsanê neteweperwerîye geş bikero û bi nê hawayî bibo îqtîdar. Ma mîtîngan de dî ke şar vera ney vejîyeno.”

Koçyîgîte pare kerd ke polîtîkayê Îtîfaqê Cumhur û Îtîfaqê Mîletî manenê pê û vat: “Nê îtîfaqî çareserîye nîyê alternatîf nîyê. Eke Îtîfaqê Mîletî wazeno demokratîk bibo ganî goş bido HDPyî ser. Rolê HDPyî her roje hîna xurtêr beno. Seba çareserîya meseleya kurdan, seba teslîmkerdişê heqanê elewîyan, seba çareserîye meselayanê cinîyan ganî vateyê şima est bê. Ma qala îtîfaqêkê taktîkî nêkenê. Ma girîngîye danê Îtîfaqê Demokrasî ser. Îtîfaqê Demokrasî reyde şar do bieşko nefes bigêro. 25ê na menge de asta serekan de pêvînayîşê Îtîfaqê Demokrasî do bêrê kerdene û detayî eşkera bibê. Menga êlule de zî ma ney bi hîrayî rayaumûmîye rê îlan bikerê. Yewîya ma ya xurte ya têkoşînî wina do bêra afernayene.”