Dinya de mîyanê hêzanê serdestan de “hemberîye” dewam kena. Seke vanê maseyê girsî maseyanê qijan wenê. Dewletî zî mabênê xo de têkoşînê serdestîye domnenê. Bi taybetî şerê Ukrayna ra dima no têkoşîn hîna zêde har bî. Nêzdî 2 serrî yo Rûsya û Ukrayna şerêkê gonînî kenê. Wirdî hetan ra xeylêk sîvîlî şîyî heqîya xo. Hema zî şaristanan de bombardumankerdişî û qetlîyamî dewam kenê. Tewr peyên paytextê Moskova yê Rûsya de 4 endamanê DAIŞî Crocus City Hall de wextê konserê grûba Pîknîkî de hêrişê vera sîvîlan kerd. Hêriş de 143 merdimî xedarane ameyî qetilkerdene û bi desan kesî dirbetin bîyî. Rojnameger û rojhelatnas Ruslan Suleymanovî derheqê na babete de rojnameyê ma rê tayê ercnayîşî kerdî.
Suleymanovî ard ziwan ke rixmo ke her çî Rûsya de binê kontrolê FSByî yanî îstîxbaratî de yo, hêriş qewimîya û wina vat: “Nê hêrişî de xeylêk persî hişê merdimî qûrdî kenê. Mîsal destê ê terorîstan de xeylêk çekê otomatîkî est bî. Nê merdiman hende çekî senîn û ça ra girewtî? Ê senîn bê astengîye û bê problem resayî na salone. Hêrişkaran hema-hema 20 deqa hêrişê vera sîvîlan kerd û raştê tu astengîyêke nêameyî. Ne polîs ne zî hêzê asayîşî yê bînî nêameyî cayê serebûtî. Dima ra hêrişkarî yewna zî bê astengîye salone ra vejîyayî û kêmî-zêde 400 hezarmetre rayîr ra şîyî. Netîce de Bryansk de tepişîyayî. Ez texmîn kena ke merdimêkî Rûsya de înan rê hetkarîye kerde. Labelê ma bi temamî nêzanê ke kam o. Bêguman terorîstan rê hetkarîye virazîyaye. Eke nêbîyêne, înan bi asanî nê çekî nêgirewtêne. Bê hetkarîye hêriş mumkun nîyo.”
Putîn hêrişî şuxilneno
Suleymanovî dîyar kerd ke eke Rûsya nê persan eşkera nêkena, şik afernena û wina dewam kerd: “Heta ke Rûsya nê persan rê cewabê şênberî nêdana, ez îstîxbaratê Rûsya ra guman kena. Yeno zanayene ke rewşa Rûsya Ukrayna de zêde baş nîya. Putîn wazeno ke şarê xo hîna zêde bîyaro pêser. Seba nê, afernayîşê nefretî hewce keno. Şarê Rûsya şerê Ukrayna rê zêde eleqedar nêbî. Putînî waştêne şar bi girseyan tewrê ci bibo. Xora nika şima zî vînenê, Putîn hêrişê Moskova ra feydedar beno û Ukrayna rexne keno. O tu delîlêk nêmojneno û wina sucdar keno. Rûsya de rexnekerdiş yan şermezarkerdişê Ukrayna her tim zaf asan o.”
Ukrayna sucdar nîya
Rojmaneger Suleymanovî wina qisey kerd: “Goreyê fikrê mi nê hêrişî de destê Ukrayna çîn o. No hêriş sera se duştê menfaetê Ukrayna de yo. Xora nika Ukrayna maruzê bombardumananê Rûsya manena û cepheyan de rewşa Kîevî zî zêde baş nîya. Çira hêrişê winayênî bikero û Rûsya hêrs bikero? Bi mi no mentiqî nîyo. Ez Ukrayna qetî sucdar nêkena. Seke mi cor de vat, heta ke îstîxbaratê Rûsya persanê ma rê cewab nêda, ez înan ra şik kena. Rûsya de her çî, bi taybetî pêro pêrênuştişî û cuya taybete bi temamî binê kontrolê îstîxbaratî de yê. Coka bê hetkarîye hêrişo nîyanên mumkun nîyo. Ganî ma tehqîqatê fermî bipawê û dima ra bi hawayêkê tesilî qisey bikerê. Nika beşdarîya DAIŞî zelal nîya. Wina aseno ke peyê DAIŞî de kesêk est o.”
Rûsya çira melumat nêwazena?
Suleymanovî hêrişê Moskova de derheqê têkilîya Tirkîya de zî fikrê xo pare kerd û wina vat: “Ma zanê ke dide hêrişkarî Tirkîya de mendê, demê xo derbas kerdê, tewr zîyade fotografî antê û uca ra derbasê Rûsya bîyî. La hema zî destê ma de zanayîşêko şênber çîn o ke înan Stenbol de se kerdo û kamcî têkilîyî awan kerdê. Yew zî Rûsya derheqê înan de Tirkîya ra melumat nêwazena. Bi mi no zî zaf balkêş û şikdar o. Rûsya nika Tirkîya sucdar nêkena. Çike wina aseno ke delîlê şênberî çîn ê. Qaso ke ez vînena Anqara zî netîceya tehqîqatî pawena. Îdareyê Anqara tayê persî şirawitê. Yanî qaso ke derheqê girewtişê çekan û dekewtişê terorîstan de pers kerdo. Seke mi vat, her çî pabesteyê tehqîqatî yo. Ma ey bivînê û goreyê ci qisey bikerê.”
