Çend serranê peyênan fekê kam kî beno ra, şîddetê ser cinîyan, qetilkerdena cinîyan ser o qisey keno.   Çiqas bî zêde hûmaran danê. Zanîme ke no hîn ju rey de nêbî… Wastena îqtîdar, wastena sîstemê kapîtalîst cinîyan ra nawa. Bêveng vinderî, qesê nêvajerî, jê kole camêrd se va hîn bikerî. Na polîtîkaya îqtîdarî wextê mehkemekerdişê qetilanê cinîyan de kî xo musnena. Pêro na nejdî bîyayene, na polîtîkaya bêceza raverdayen û quwetêko qilêrin dana camêrdan. Îqtîdar ra piya zerê çeyan de kî qilêrîya camêrdan vila bena û xo musnena. Cinîyê ke nêbenê kole cinîyê ke na qilêrîya camêrdan bi vengê berz anê ra ziwan benê hedef. Armancê sîstemî û camêrdan ju yo. Cinî ma rê bibî kole.

Hewteyo verênî de  çapemenîye de xeylê ca girewt. Mêrdîn de keso bi namê Osman Çur, tecawizê çena birayê xo kerdo. Ameyo pê girewtene dima ra kî ameyo raverdayene. Vernîya hepsî de tecawizkar hetê keyeyê xo ra bi dawul û zurneyan ame vervazî kerdene. No bîyayîş asmên ra bi gere kerdena waya domana 17 serrîne vejîya werte.

Domana 17 serrîne hetê apê xo ra raştê tecawizî yena. Asma Temmuze de di reyî rojanê 4 û 5’ine de raştê tecawizê Osman Çurî yena. Hende kes dormê domana 17 serrîne de esto hama kes nêyî nêvîneno, pênêhesîno ya kî ju vatîse de bîna ebi xo kî bese nêkena kes de nêyî ser o qisey bikero… Yena tehdît kerdene, tersê xo ra bêveng manena. Zanîme teber de ti se beno wa bibo qusir, xeta suc tim yê cinîyan o. Tacizkar û tecawizkarî xo nîya pawenê û naca ra quwet gênê.

Tecawizkar di reyî pêceriyo, dime ra kî ameyo raverdayene. Reya pêyene waxto ke ame teber mordemê xo bi dawulan şîyî verniya tecawizkarî. Cinî û camêrdî bi tîlîliyanê xo şîyî vervazî kerdena tecawizkarî. Mordem nêzaneno na qilêrîye çitur bîyaro ziwan. Hem tecawizkar hem zî ê ke şîyê vervazî kerdene jê jubînî. Zîhnîyetê nînan ju yo. Çena birayê xo rê tecawiz kerdo, naya benê sa. Her waxt sûc cinîyan de yo. Ju camêrdî, ju apî tecawizê çena birayê xo kerdo. Gere kes nejdiyê xo ra nêverdo ke ravêro, heme keye pêro ti vana tewa nêbiyo, ju cayê durî ra kes tewa vato.

No zîhnîyeto tecawizkar teyna sîstemî ra, îqtîdarî ra nê, dormê xo ra, mordemanê xo ra kî quwet gêno. Eke wertê koma xo de, hometa xo de cezaya sucî bivînê, hende rehet hêrîşê cinîyan û domanan nêkenê. Çitur keso ke çênaya birayê xo rê tecawiz biko, bi dawulan yeno vervazî kerdene. Hîn ke nêbo mordem xo ra, dormeyê xo ra û cîrananê xo ra şerm keno.

Ju çeku esta. Ensest; yena manaya zerê çeyan de hetê kesanê keyeyîra rastê taciz û tecawizî ameyî. Xeylê keyan de, xeylê kesî raştê nê bîyayîşî ameyî. Wexto ke nêame qiseykerdene, nê ser o kes nêşi, na qilêrîye yena na merhele. Xeylê bîyayîşê ensestî ameyî wedernayene. Wexto ke vejîya werte en zêde cinî bena sucdar. Camêrdî yenê seveknayene, cinîyê pîlî ke zerê çeyan der ê, domanîya xo de raştê nê hêrîşan ameyê, tim dardê we, nika kî domanan û tornanê xo ra kî naye wazenê. Nê taciz û tecawizkarî bi polîkayanê îqtîdarî piya zerê şarî de her ke şî bêehlakîye xo rê kenê. Pêro na qilêrîye waştena sîstemî ya.