Parlamenterê Partîya Çep a Keske yê Êlihî Mehmet Ruştu Tîryakîyî bale ante paştîdayîşî û wina vat: “Ma do îtîfaqê xo yanî Îtîfaqê Kede û Demokrasî pîlêr bikerê û xebatanê cidîyan bikerê.”
Tîryakîyî pare kerd ke weçînayîşan ra dima teyna Partîya Çep a Keske prosesê rexnekerdiş û rexnedayîşî dayo destpêkerdene. Tîryakîyî vat: “Ma şarî reyde kombîyayîşî kerdî, meseleyan ser o qisey kerd. Dima ma komxebatî zî kerdî. Konferansê xo de zî ma tay birî girewtî. Kongreya teşrîna verêne de ma do nê biran ser o qisey bikerê. Hemserekanê HDPyî weçînayîşan ra dima cade vat ke ê do reyna nêbê namzet û şorê kongre. Ma do kongreya xo de xo newe ra awan bikerê.”
Tîryakîyî bale ante rexneyanê şarî ser û vat: “Şarî rexne kerd ke çira ma weçînayîşanê serekkomarîye de namzetê/a xo nêveto/a. Reyna tay rexneyan zî vat ke ma do bawerîyan de zaf nêameyî têhet. Şar partîya ma ra wazeno ke ma derheqê tecrîdî de zî gamanê lezan bierzê. Konferans de zî babeta tecrîdî rojdem bîye. Qetî ma do vera tecrîdî çalakî û aktîvîteyan bikerê.”
Tîryakîyî dîyar kerd ke înan şarî rê qala sîyasetê Rayîrê Hîrêyînî zaf nêkerda û do na mesele ser o vinderê. Tîryakîyî vat: “Eşkera yo ke ma qala nê sîyasetî hîna zaf bikerê. Ma yew beşê Îtîfaqê Cumhurî û Îtîfaqê Miletî nîyê. La şarî wina hesibnayo. Kêmasîya ma bîya sebebê ney. Ma do îtîfaqê xo yanî Îtîfaqê Kede û Demokrasî pîlêr bikerê û xebatanê cidîyan bikerê.”
