Ugur Kaymaz û babîyê ci Ahmet Kaymaz Mêrdîn de serê goranê xo de ameyî yadkerdene.

Ugur Kaymaz û babîyê ci serra 19. de qezaya Qoserî ya Mêrdînî de taxa Pirîketa de serê goranê xo de ameyî yadkerdene.

Keyeyê Kaymazî, parlamenterê HEDEPî û xeylêk kesî tewrê merasîmê yadkerdişî bîyî. Wextê merasîmî de sloganê “Şehîd namirin’” ame vatene.

Hemsereka HDPyî ya Qoserî Aysel Ayave îfade kerd ke gorê Ugur Kaymaz û babîyê ci çend reyî raştê hêrişî ameyê kerdene û ê do vera nê ferasetî têkoşîn bikerê.

Parlamentera HEDEPî Bêrîtan Guneşe ard ziwan ke faîlî yenê pawitene la Ugur Kaymaz sey ‘terorîstî’ yeno pênasekerdene.

Hemserekê HEDEPî yê Mêrdînî Alaaddîn Turan û Parlamenterê HEDEPî Kamuran Tanhanî zî pare kerd ke ê do qetî nê qirkerdişî nêdê vîrakerdene.

Dadîya Ugur Kaymazî Makbule Kaymaze vat: “Domano 12 serre nêbeno terorîst. 3 reyî kerrayê goranê ma ameyî şiknayene. Ê merganê ma ra çi wazenê?”

Qiseykerdişan ra dima girseyî qeranfîlî nayî goran ser û merasîm bi sloganan qedîya.