Xelatê Rojnamegerîye yê Musa Anterî û Şehîdanê Çapemenîya Azade ameyî vilakerdene.
Xelatê Rojnamegerîye yê Musa Anterî û Şehîdanê Çapemenîya Azade bi merasîmêkî ameyî dayene. Merasîm hetê rojnameyê Yeni Yaşamî ra Merkezê Kulturî yê Cemîl Candaşî de ameyî kerdene.
Hemsereka HDPyî Pervîn Buldane, Hemvervatoxê Kongreya Demokratîke ya Şaran (HDK) Cengîz Çîçek û Esengul Demîre, Serekê EMEPî Ercument Akdenîz, Hemserekê KESKî Mehmet Bozgeyîk, Hemsereka Komela Rojnamegeran a Dîcle-Firatî (DFG) Dîcle Muftuoglu, Platformê Rojnamegeran ê Cinîyan ê Mezopotamya (MKGP), DÎSK Basin-Îş, Mayê Aştîye, dadîya rojnameger Mazlûm Erencîyo ke amebî qetilkerdene Remzîye Erencî û xeylêk temsîlkarê rêxistinanê komelê sîvîlî tewrê merasîmî bîyî.
Akademîsyenanê aştîye Elîf Ege û Onur Hamzaogluyî Xelata Xebera Tirkî ya Taybete ya Jurîye daye muxabîranê Ajansê Mezopotamya (MA) Semra Turane û Tolga Guneyî. Xelatê bînî hetê Hemsereka HDPyî Pervîn Buldane ra dîyaye.
Beşê Xebera Tirkî de xebera ‘Îdîaya tecawuzê vera domana 2 serre’ ya rojnamegera Bîanetî Evrîm Kepeneke xelate girewte. Beşê fotografî de fotografê cenazaya Hakan Arslanî ya ke esteyê ci tewreyêk de dîyabî, layîqê xelate bî. Fotograf hetê muxabîra MA Eylem Akdage ra amebî girewtene. Beşê Xebera Kurmancî de xebera ‘Manaya bilibendî û çend sirê Kurdish Mashupî’ ya rojnamegerê Dengê Emerîka Omer Faruk Baranî xelete girewte. Xelata Taybete ya Jurîye ya Xebera Kurmancî zî dîyaye xebera ‘Derheqê hêrişê nîjadperestî yê Kazakîstanî de agahîyê neweyî’ yê rojnamegera Jinnewsî Medya Urene. Xelata Muxabîrîya Cinîyan dîyaye xebera ‘Polîsî eşt ser; dozger, doktor û polîsan nimna’ ya Mudira Karanê Nuşteyî ya Jinnewsî Safîye Alagaşe. Xelata Karîkaturî dîyaye karîkaturê ‘Atlasli’ yê Ozgur Evranî û karîkaturê ‘cesedo ke tira vilikî zîl benê’ yê Murat Îpekî.
Xelata Rûmetî zî dîyaye dadîyanê Nobeta Edaletî.
