Dayîka Denîz Poyraze Fehîme Poyraze sergêra 2. ya qetilkerdişê kênaya xo de wina qisey kerd: “Her kes Denîz o. Ez her keso ke tîya de yo, sey Denîze vînena. Denîze Denîza pêrun a.”

Keyeyê Denîz Poyraze, Hemvervatoxê Partîya Çep a Keske Çîgdem Kiliçgun Uçar, Îbrahîm Akin, parlamentera Îzmîrî Burcu Gul Çubuk, îdarekarê SYKP û EMEPî, rêxistinê HDPyî yê Îzmîr û qezayan, avûkatê Poyraze û Dayîkê Aştîye tewrê vîrardişî bîyî. Programê vîrardişî bi rêzgirewtişî dest pêkerd.

Dayîke Fehîme Poyraze vat, “Kênaya mi ameye qetilkerdene. Kamî ke paştî daye kiştoxî wa ê zî bêrê cezakerdene. Wa dewlete nêvajo ‘yew însane merde, do bêro vîrakerdene’. Şehîdî çirey nînê vîrakerdene, ê do tim mîyanê ma de biciwîyê. Her kes Denîz o. Ez her keso ke tîya de yo, sey Denîze vînena. Denîze Denîza pêrun a. Jin, jiyan, azadî.”

Parlamentera Partîya Çep a Keske ya Îzmîrî Burcu Gul Çubuke zî soz da ke ê do Denîze her ca de bidê ciwîyayene û vat, “Ez înanê ke şexsê Denîz Poyraze de binê slogana ‘jin, jiyan, azadî’ de têkoşîn kenê,  silam kena. Têkoşînê Denîze nêvindert, dewam keno. Vera sîstemê dewleta camêrdî ma pêro pîya têkoşîn kenê. Ma tîya de yê, têkoşînî canêverdenê û sozo ke dayo Denîze anê ca.”