Hemserekê Pêroyî yê DBPyî Keskîn Bayindirî giranîye daye tecrîdê vera Serekê PKKyî Abdullah Ocalanî û wina vat: “Seba ma rojdemo tewr girîng bêguman tecrîd o. Birêz Abdullah Ocalanî ra 33 mengî yo xeberêke nêna girewtene. Mesuldarîya ma ya ke ma vera tecrîdî têkoşînêkê hîna bitesîrî bikerê.”
Bayindirî vist vîrî ke serra 2023yî seba kurdan bi xoverdayîşî derbaz bîya û vat: “Kurdistan û pêro Rojhelatê Mîyanênî de emser kurdan xoverdayîşêko pîl kerd. Heyf ke ma ancî bi meseleya kurdan kewenê serra 2024î.
2023 de Rojhelatê Kurdistanî de xoverdayîşê Jin, Jiyan, Azadî geş bî. Başûrê Kurdistanî de serebûtê girîngî qewimîyayî ke serkewtişê weçînayîşanê Kerkûkî de ma ney vînenê. Hetê bînî ra 2023 de PDKyî xizmetê dewleta tirke ancî nêterikna. No zî xora tesîrê zaf çîyan keno. Şarê Başûrî hînî nê sîyasetê PDKyî qebul nêkeno. Rojawanê Kurdistanî de hêrişanê dewleta tirke de xeylêk merdimê ma şehîd bîyî. Dewleta tirke Başûr û Rojawan de bi hawayêkê zelalî sûcanê şerî kena. Vakurê Kurdistanî de şar 2023 de hertim payan ser û mîyanê xoverdayîşî de bî. Îqtîdarê AKP-MHPyî sey her wextî çareserîya meseleya kurdan peygoş kerde. Dewleta tirke û îqtîdarî bi şerê vera kurdan şar mehkumê xizanîye kerd.”
Bayindirî da zanayene ke tecrîdê serê Rayberê Şarê Kurdî Abdullah Ocalanî rojdemê înan o verên o û vat: “Ciwanê ma 2023 de vera polîtîkayanê şerê taybetî û tecrîdê Îmraliyî payan ser de bîyî. Heyf ke 2023 de bi taybetî zîndanan de zulm zêdîya. Seba ma rojdemo tewr girîng bêguman tecrîd o. Birêz Abdullah Ocalanî ra 33 mengî yo xeberêke nêna girewtene. Mesuldarîya ma ya ke ma vera tecrîdî têkoşînêkê hîna bitesîrî bikerê. Nika seba azadîya Ocalanî zîndanan de grevê vêşanîye yeno kerdene. Ganî ma bi xurtî paştî bidê grevê tepişteyan.”
